Kawl ralhrang chungtel tampi hna hi an duh ruangah si loin an chungkhar kong le pumpak hrocer nak ruangah Ralhrang kut in a luat kho lo i nihin tiang ralhang kuttang ah hriamtlai tampi an um ve rih hna.
Cheukhat cu zeihdah kan tuah ti awk hmanh a theilo mi an tam hna i miphun le ram kan kilveng ko rua tiah ruat in ralhrang kuttang ah a ummi an tamtuk ve. An mawh ve lomi thil pakhat cu anmah ralhrang chungah a hmaanmi thawngthanh nak aum kho lo, pumpak in phone le internet an hmanter duh hna lo mi ruangah zeitluk in dah ramchung mipi lung kan fahter i an ngaih kan chiatter hna ti a thei ve lomi tampi zong an um ve rih hna.
Tuchun ah KNLA leiin thawngthanh nak an rak tuah mi cu “Gya Inn Seih Gyi (ကြာအင်းဆိပ်ကြီ) leiin Kawl ralhrang chungtel Khah-Lah-Yah (284) ralkap pakhat cu a hriamtling he KNLA sinah a rak phan” tiah an langhter hi asi.
Gyi Inn Seih Gyi in Kawl ralhrang chungtel Khah-Lah-Yah 284 i ralkap pakhat cu KNLA sinah a hriamnam vialte chiah dih in CDM a rak tuah tiah Nagani phu hna nih thawngthanh nak an tuah.
Khah-Lah-Yah 284 i ralkap chungtel Saat Paing Htun cu tuchun December 1, suimilam 12 hrawngah khan Nagani battalion-2 le KNLA Tat-yin 17 hna phufonh sinah a meithal le kuan, pumpak pehtlaihnak seh he a rak phanh hi asi.
CDM a rak tuahmi ralhrang chungtel Saat Paing Htun caah cun KNLA ralkap hna nih hniphuan le ei-din, cun phaisa tamngai zong laksawng an pek hnuah hmunhim ah an chiah cang tiah theih asi.
Nagani battalio-2 le KNLA Tat-yin 17 sinah hin kawl ralhrang chungin CDM a rak tuahmi hi minung 10 leng an si cang hna hi an dihlak in hmunhim ah an um ko hna tiah zong an langhter chih.