Minbu peng ah a ummi Taw-Chaung-Oo ralhrang sakhan cu PDF nih tuzing ah an lak khawh, ralhrang tampi an thah khawh fawn hna.
Sagaing ramthen, Minbu peng, Taw-Chaung-Oo ralhrang palik sakhan cu PDF ralkap hna nih tuzing ah khan an luhhnawh hna i ralhrang palik minung 7 an thah hna hnuah an sakhan cu an lak khawh i hriamnam zeimaw zat zong an lak chih tiah Zero-7 PDF chungtel hna nih thawngthanh nak an tuah hi asi.
November 30, zinglei suimilam 6 hrawng khan Minbu peng, Taw-Chaung-Oo ralhrang palik sakhan cu PDF nih an luhhnawh hna i an kah hna, PDF pawl nih hin kah sawhsawh i hnukir than dingin an i timhmi si loin zeibantuk dirhmun asi zongah sakhan lak hrimhrim dingin an kalhnawh mi hna asi caah kahdohnak zong afak ngai.
Cun PDF nih sakhan an lak khawh lai hrawng ah khan cun Maungzua leiin ralhrang nih Helicopter zong an rak thlah i fak ngaiin a rak kah ve hna nain PDF leiin hriamtuar le a thimi kan umlo tiah PDF lei nih cun an langhter.
Tuzing ralhrang palik sakhan kahdohnak hi Zero-7 poih-gia nih an hruaimi hna asi i G4G PDF, Nagani PDF, Sagaing PDF1 &2 le Minchain PDF tat-yin 6 hna i fonh in ralhrang palik sakhan an kahdoh hna hi asi tiah langhter ning asi.