Vote Cazin Latu Meithattu Pa Thah A Ton Hnu In Tualchung Mi 20 Leng Tlaih An Tong. Yangon ramṭhen, Hlaing peng ah vote cazin latu Lu Aye cu thah a tong, tiah theih a si.
February ni 3 zanlei sml 3:00PM hrawng ah Hlaing peng Zeyarmingalar 2 lam ah vote cazin latu, SAC ralkap thawngpetu meithat phu chungtel Lu Aye cu min hngalh lo phu nih an thah, tiah theih a si.
Thah a ton hnu in Zeyarmingalar 2 lam ah SAC ralkap nih khual cazin an check i tualchung mi 20 leng tlaih an tong, tiah theih a si.
“SAC ralkap thawngpetu Lu Aye thah a ton hnu in SAC ralkap nih, thah a tonnak hmun pawngkam hrawng ah a ummi mino hna le tualchung mi hna cu an tlaih hna. Lakphak dawrngeitupa zong an tlaih,” tiah theih a si.
Cu ṭhiamṭhiam in Yangon ramṭhen, Tungkhuah peng Yepawkan khuabawi Kyaw Myo Lin thah a tong, tiah theih a si.
February ni 3 zinglei sml 11:30AM ah Yepawkam khua, khuabawi Kyaw Myo Lin cu a innhmai ah min hngalh lomi hriamtlai nih a paw ah am kah caah a thi, tiah theih a si.
Thawngpang dang: Kanbalu Toolgate Ah SAC Ralkap Motor Bomb Puahhnawh An Tong, 5 An Thi
Sagaing ramṭhen, Sagaing peng Kanbalu Toolgate ah mipi sin in phaisa khawltu SAC ralkap hna cu motor pakhat in an kirlei ah Yuamah le Nathkayine kar ah bomb puahhnawh in kahdoh an tong. SAC ralkap ralbawi pakhat telh in ralkap 5 an thi tiah Zero Pahkahphah hruaitu Ko Htat Kyi nih a chim.
” An um kal ning ṭha tein kan ngiat hna, an kirlei cu kan hmuh hna caah anmah zawn ah bomb kan puahhnawh hna, an i citmi motor cu hmailei ah aa let i a kee a tlongh caah a dir, SAC ralkap bothum pakhat le ralkap 4 an thi” tiah a chim.
Bomb puahhnawh in doh a tongmi SAC ralkap hna nih cun an pawngkam hmunkip cu an kah leng ah, Nathkayine khuachung ah cawlcanghnak an tuah tiah theih a si.
SAC ralkap hna cu Zero Pahkahphah le tualchung hriamtlai Tayeni phufonh nih an doh hna tiah theih a si.