Lainu lak ah awtha le muidawh kan i ngeih bakmi le tulio mipo nih uar taktak mi Singer Van Hlei Sung nih a chimmi bia hi uar a um bik ko. Atang lei hi Singer Van Hlei Sung bak nih a tial mi cu an si hih.
Israel pa, kum 3 chung Israel caah raal ado i commando zong arak ttuan mi nih bia aka ruah.
A chimmi chungah ka uartuk mi biapi pathum (3)
1. Kan nih Isreal mi cu raal nih a kenkip loin arak kan doh i kan tei hnga lo ding raal tiang zong kan tei dih hna. Aruang cu HRIAMNAAM tthabik PAKHAT te kan ngeih. Mah hriamnaam cu zeidah asi ti ah cun, “kan miphun nih ISRAEL ti dah lo cu RAM DANG kan ngei ti lo i, kan nun ah siseh, kan thih ah siseh, kan ram kan kilveen ding cu kan rian asi,” timi lungput hi faak piin kan i tlaih ruangah asi.
2. Kanmah ISRAEL zong, nanmah bantuk in hriamnaam kan rak ngei ve lo. Raal arak thawh ah hin vanlawng pahnih te lawng kan rak ngeih asinain duhsah tein kan i zuam kan i zuam i, nihin ah ISREAL cu atthawng cem ah kan i chuah ko.
3. Dictatorship cu kan doh awk asi, kan tei awk asi. Nan miphun zong nih RAM DAWTNAK lungput taktak he nan doh chinchin ah cun teinak cu nan hmuh te hrim la. Kum 10, kum 20 zong rau hmanhseh an tei ko la. Akum arauh mi zong nih khan nan lungtthul hlah u. Fawi tein hmuh khawh mi thil cu asunglawi bal lo. Caan saupi pek in i zuamnak in tuah mi lawng kha an sunglawi.
Dawtmi CHINMI Pa Pathian nih Chinram hi akan peek hrimhrim mi asi ko. 100 ah 100 in ka zumh. Amah, Pathian lila nih akan bawmh ko. Amah lila nih akan chanchuah fawn ko la. Kan raalkaap nih hriamnaam tlaamtling an ngeih lo bu hmanh in mah zatzat raal lo kaap pawl an tei cang mi hna nih hin, Pathian nih akan umpi timi ai fiang lo maw? Kei ka caah cun ai fiangtuk.
Caan saupi timhtuahnak angei mi uknak ttha lo nih ruah lo piin akan doh bu hmanh in mah zatzat kan tei mi hna hi nan khuaruah ahar lo maw? Pathian dah ti lo ah aho hlei nih khin dah atei khawh hna hnga?
Bawipa dawtmi Chin miphun kan si ve!
ISRAEL bantuk in teinak kan hmu ve hrimhrim la! Bawipa nih akan umpi ko.
Kumhnih chung te lawng pei kan doh rih ko cu. Ram chanchuahnak caah kumhnih lawng a rau bal lo. Kum caan saudeuh zong aherh cun arau rih ko lai asinain nan lung zor hlah seh. Raaltthaa taktak in dir rih ko u.
Thazaang i pe tthan hna usih. DALAN bia le innkua lungkua ah aa nawk mi cattial pawl zong reltuk hna hlah usih. Lungvaihnak, lungcawtnak menmen an si.
Thla cam hna usih, Bawipa lawng i bochan hna usih. Zeican va rau rih ko seh. Kan hriamnaam tthabik ah Pathian le KAN RAM kan dawtnak lungput he raal cu DOH rih ko hna usih! Jesuh thawngin kan tei hrimhrim lai.
Khua a dei lai…
Kan ram ah kan kir caan a phaan te ko lai.
Lungsau in,
CHIN MIPHUN,