Miphun hawi ti din awk le ti hman awk a ngei lomi chungkhar 20 caah tikhor cawhpiak kan duh hna, thlacamnak zong ka ngei.
Miphun hawi dawtnak ti khor 4 cawhnak in a van kan tel pi tu Shine Hill Company pu Ceu Hlei Lian le Pi Sung Khun Tial te cungah lunglawmhnak chim cawk lo ka ngei.
Annih nupa hi Yangon um laimi nih kan i bochanmi an si i, Ka rianṭuannak thazaang a ka chuahpi zungzaltu an si. Miharsa le bawmh herh mi hna bawmtu ah Pathian nih thluachuah chin ko hna seh. Credit: Rev. Thawng Tha Thang
Thawngpang dang: Hramhram in uknak lak a si hnu in bomrap ruang ah a nunnak a liam mi mipi a za leng an si cang, cheu 3 ah cheu 1 hi hngakchia an si
SAC nih hramhram in uknak a lak hnu 2021 February 1 in 2022 September thla tiang bomrap ruang ah a nunnak a liam mi sualnak ngei lo mipi 157 an phan cang i hliam a tuar mi 395 an um cang tiah Landmine Monitor Report 2022 nih a langhter.
Cubantuk bomrap ruang hliam a tuar mi le a nunnak a liam hna chung in cheu 3 cheu 1 hi hngakchia pawl an i tel tiah a langhter fawn.
Cun UNICEF nih 2022 January in October thla tiang bomrap ruang ah hliam a tuar mi le a nunnak a liam mi mipi 333 an um tiah 2022 November thla ah a hnu bik cazin an khawmhsuat khawh mi a rak langhter ve.
Bomrap ruang ah a nunak a liam mi 86 an si i hliam a tuar mi 247 an um tiah a langhter. Cu chung ah pa 45 an nunnak a liam, 123 an i hliam i nu 13 an nunnak a liam, 44 an i hliam tiah a langhter.
Hngakchia 108 hi bomrap ruang ah hliam a tuar mi le a nunnak a liam mi chung ah an i tel ve i cu chung ah pa 23 an nunnak a liam, 56 an i hliam i nu 5 an nunnak a liam, 24 hliam an tuar tiah UNICEF report ah hmuh khawh a si.
Myanmar ram chung ah bomrap accident a tambik nak hi Shan ram a si i 100% chung ah 35% bak a cang i hliam a tuar mi le a nunnak a liam mi minung 117 an si tiah an langhter.
A pahnihnak hi Sagaing ramṭhen a si i 100% chung ah 15% a cang i hliam a tuar mi le a nunnak a liam mi minung 52 an si.
A pathumnak ah Rakhine ram a si i 100% chung ah 11% a cang i hliam a tuar mi le a nunnak a liam mi 35 an phan ve.
Atu langhter mi cazin hi SAC ralkap nih dothlennak phu pawl tinh in a puah mi le hliam a tuar mi pawl aa tel lo tiah UNICEF nih a fianhter.
Cun, Chin ramkulh chung zong ah hramhram in uknak a si hnu thawk in bomrap ruang ah hliam a tuar mi a za leng an si cang tiah India for Myanmar in rianngeitu Salai Dokhar nih 2023 January 23 ah Chin World ah a chim.
“Bomrap ruang ah hliam a tuar mi cazin hi ka sin ah a um lawng hmanh in a za an phan cang. Adang phu sin zong ah cazin a phan mi a um. Kan khawmhsuat cuahmah liopi a si” tiah a chim.
Cucaah mipi hna nih bomrap ral in kan himnak hnga SAC ralkap pawl an umkal tawnnak hmun pawl, SAC ralkap pawl hmunhma an khuarnak, kahdoh a chuahnak hmunhma pawl kha hrial khawh i zuam hna usih law ralring deuh tein umkal khawh i zuam hna u sih law a ṭha tiah a chim.