Katha peng, Ahlelkyun khua kahdohnak ah SAC ralhraang 8 an thi. Sagaing ramthen, Katha peng, Ahlelkyun khua pawng kahdohnak ah Council ralkap 8 an thi tiah Katha pengkomh um rammi rungvengtu phu naihniam sin in theih a si.
January 22 ah Shan ramkulh, Mabein peng, Ngaroe khua um ralhraang Infantry Battalion-121 in ralhrang 100 tluk cu Katha peng chung ah raal lam sial in hmai an nor caah rammi rungvengtu phu he kahdohnak a chuak.
Cu kahdohnak cu January 24 tiang a rau i ralhraang pariat an thi. Ralbawi pakhat a khuk ah bomb kuan nih a khen i hma a put caah helicopter in an don tiah theih a si.
“Kahdohnak ni hnih chung a chuak. Ralhraang pawl an cei caah Ahlelkyun khua cu ralkap ruak he mei in an khangh. Ralkap pariat an thi i ralbawi pakhat a khuk cung ah bom kuan nih a khen caah helicopter in an rak don.
Raal hmun thianhnak zong ah ralkap ruak kan hmuhm” tiah Katha pengkomh um rammi rungvengtu phu he aa naihniam mi pakhat nih Khit Thit Media ah a chim.
Kahdohnak a chuahnak hmun le ralhraang nih mei an khanghnak hmun thianh lio ah SAC ralkap ruak, ralkap thuam le an hman mi thilri pawl hmuh a si.
Ralhraang nih meikhanghnak ruang ah inn 32, high-school sianginn pakhat le zung riantuan umnak inn a ciam tiah theih a si.