Mizoram Siaha Khuami Pathum Cu CDF Ah Ruahmi Pakhat Nih A Hlen Hna I, An Nunnak A Laak Hna!
Mizoram, Siaha khua mi pathum hna cu CDF misa ah ruahmi pakhat nih phaisa kongah a hlen hna i, 19-3-2023 ah khan Siaha an chuaktak i, Nizan 22-3-2023 zan ah an pathum in Ainak khua pawngah an ruak in hmuh an si, tiah Siaha ummi pakhat nih The Chin Post ah a chim.
Siaha le Ainak khua pawnghrawng zatlang hruaitu hna nih ruak cu an va fimhlawm hna i, Siaha lei an panhpi lio hna a si. Thawngfiang deuh kan hlat cuahmah lio a si.
Rohingya 1,000 Hrawng April Thla Ah Kan Laak Hna Lai – SAC: Bangladesh ram ah a zaammi Rohingya 1,000 leng cu Myanmar ram luh ṭhan ding ah April thla lai hrawng in cohlan ding timhtuahnak kan ngei, tiah SAC nih an langhter.
Ram hnih hnatlaknak in a voikhatnak ah Rohingya 1,000 tluk kan cohlan hna lai i, cazin zong zohfelnak ṭha tein kan ngei cang, tiah SAC chimphuannak nawlngeitu Zaw Min Htun nih March ni 22 ah Agence France Presse (AFP) ah a chim.
Rohingya hna cu Myanmar ram kir ṭhan ding timhtuahnak hi zeitik in dah an thawk te lai ti cu kan hngal rih lo, tiah Banladesh ram um hartongmi le an ram kuat ṭhannak kong ah chimphuannak nawlngeitu nih March ni 15 ah a rak chim.
Ram hnih kar cozah timhtuahnak in Rohingya 1,140 cu Myanmar ram kir ṭhan ding in cazin an pek i cu chung ah 711 hi an konglam ṭha tein zohfelnak an tuah cang. A taangmi 429 hi chekhlatnak an tuah hna lio a si, tiah theih a si.
Myanmar ram kir ṭhan ding in cazin a pemi Rohingya 1,140 hi NLD chan lioah Myanmar ram kir ṭhan ding in min cazin a rak pe cangmi an si, tiah theih a si.
SAC le Rakhine ramkulh chung mi lutchuak chekhlattu Minister Myo Aung nih a hruaimi 17 cu a luancia zarh ah Bangladesh ram ah an kal i hartong mi hna he tonnak an ngei, tiah theih a si.
Bangladesh an tlawn hlan ah India, Tuluk, Bangladesh telh in ram 8 in Ambassador 11 cu SAC nih Myanmar-Bangladesh ramri Maungtaw peng ah Rohingya an kir tikah an umnak ding hmunhma an rak zohpi hna.
Bangladesh ram um ralzaam camp ah aa dormi Rohingya hna nih rammi sinak, zalong tein umkal khawhnak le Myanmar ram um ṭhan khawhnak hi a bik in an halmi a si, tiah theih a si.