MOU system in Thailand ramah phungning tein Work Permit he riantuan dingah a kalmi hna Kawlram mi pawl cu lam cenceo an phak ah an mawtaw accident an tong i minung 3 an thi tiah thawngpang theih asi e.
Motor accident ruang i a thimi hna Kawlram mi minung 3 hna lakah pakhat hi Shan ramthen, Pyin Lawng pengkulh i Hti Yuan khuaah a ummi mg Khone Han Aung (kum 19) tu hi cu a chungkhar he pehtlaihnak an tuah khawh cang caah a ruak kong zong tlamtling in tawlrel piak asi cang tiah theih asi.
Asinain a taangmi ruak pahnih tu hi cu an chungkhar he pehtlaih nak an tuah kho hna lo i an chungkhat pawl nih an nunnak liam cang ti zong hi an thei rih hna lai lo tiah lung nuamlo ngaiin ruak tawlreltu pakhat nih cun a chim hi asi.
Chungkhar pawcamnak ruah ah le hringtu nulepa zawnruah ruangah tiin run inn nuam le khuadawh chuahtaak in miphun dang le ramdang ah kan mino hna tamtuk nunnak a liam cangmi hi ruah riangmang ah cun Kawlram miphun hi mi vanchia kan si ko lo maw tiin ruak charnak i a kal vemi pakhat zong nih a chim hi asi.
Kawl ralhrang nih uknak an lak hnuin Kawlram chung thilman vialte hna cu nikhat hnu nikhat a kai chin lengmang i sifak le santlai lo caah cun zingzaan ei-din le ti rawl zalhnak hi a fawi ti lo.
Rawltaam in thih lai ruah khawh lo ruangah MOU System in Thailand ramah hlawhfa riantuan dingin November 29 zaan ah khan kawlram mi tampi telh in minung 45 hna cu riantuan dingah Thailand i an kal hna hi asi.
An i tinh mi hmunhma an phak hlan Mea Soh le Bangkok karlak ah minung 45 phurtu mawtaw cu accident nak an tong i Kawlram mi minung 3 zong an thih ve hi asi. Cun midang hliamtuar zong an tampi cio hna tiah thawngthanh nak ah cun an langhter.