Zualko: Chin Ramchung Mawtaw Accident Nak Ruangah Chinmi 2 Nunnak Liam, Minung 6 Hliam Tuar

Chin ramkulh, Tedim pengchung, Tungzan (သုန်းဇန်) khua in Kalay lei kalnak lam ah DINA Mawtaw pakhat cu Dimlu khua (ဒိမ်လိုး) pawngah accident nak an ton ruangah Chinmi pahnih nunnak a liam i adang minung 6 nih hliam an tuar tiah thawngpang chia theih asi.

June 20 ah khan DINA Mawtaw pakhat cu lam in pe 600 a hlatnak ah a tla i a chung ummi minung 8 cu an dihlak in hliam fak ngai an tuar hna caah Tedim siizung ah an kalpi cawlh hna tiah theih asi.

Tedim siizung i an kalpi hna chung chungin minung 4 hi an zualhma deuh ngai caah Kalaymyo siizung ah an kuat than hna nain cu zaan suimilam 9 le cheu hrawng ah khan Kalaymyo siizung hmanh phak manh loin lampi ah U Thang Khua Cin Tawng cu a nunnak liam tiah theih asi.

Cun minung 3 cu Kalaymyo siizung ah an phak pi hna hnuah U Tawng Zam hi a zual hma deuh ngai than i Mandalay siizung ah an kuat than hna June 21 zaan ah khan Mandalay siizung hmanh phakpi manh loin U Tawng Zam cu lampi ah a nunnak liam ve tiah thawngpang theih than asi.

Hliamtuar mi adang minung 6 tu cu tthat deuh lei an hun panh pah ko cang caah hnangam deuh ngai an si hna tiah Zalen nih cun an rak langhter.