Hakha Khuachung Ah Pi Iang Nak (Bawi Cin Thang Nu) Atlau

Mitlau kong bawmhhalnak. Thantlang Peng Khuabung khuami, Hakha Khuahelnak lam ah a um mi Pi Iang Nak@Bawi Cin Thang Nu (kum 58 hrawng) cu nihin October 16, chun 12:00 PM hrawng ah a leennak in atu tiang a rak tin/lawi ti lo.

May be an image of 1 person, standing, outdoors and tree

Amah hi thinlung lei a dam tuk lo mi a si. Nan inn pawng, khualak le nan duum chung tibantuk ah nan hmuhsual ahcun Phone: 09456571672 ah nan kan pehtlaih naklai zaangfah kan in nawl hna. The Hakha Times

Mizoram I Aa Dormi Ngakchia 1735 Hna Cu Sianginn An Kai Kho Cang

Myanmar ram buai ruangah Chin ramkulh in Mizoram lei ah a rak zammi ngakchia 1735 hna cu Mizoram state chung hmunkip sianginn ah cawnnak an peh kho cang, tiah School Education Department Director James Lalrinchhana nih a chim.

Education Department Director chimning ah cun ralzam siangngakchia umzat hi zarh fatin aa thleng peng, a ruang cu cheukhat an umnak an thial, cheukhat a rak lut tharmi zong an um. Atu tiang ah cun Champhai District chung sianginn kip ah ralzam siangngakchia min aa pemi an tam cem i, an dihlak in 579 an si. A changtu ah Lawngtlai district a si i, siangngakchia 539 an si ve, Hnahthial district ah siangngakchia 327 an um ve. Mah leng ah hin district dangdang zong ah tlawmpal cio an um fawn.

School Education Department Director James Lalrinchhana nih cun District kip ah Education Department hna nih ralzam siangngakchia hna cu an zohfel peng hna i anmah kum le thiamnak he aa tlak in cawnnak an peh khawh nakhnga tawlrel piak an si. Mizoram i siangngakchia hna bantukin zohkhenh ve an si. Cauk, uniform, midday meal (chuncaw) tiang in an hmuh dih ve. An lak ah hin mizo holh a thiammi zong tampi an um i, mizo holh thiam lomi hna ca zongah an theihthiam khawh dingin cawnnak kalpi a si, tiah a chim.

Mizoram Minister le MLA nih Refugees Camp An Va Zoh: Power & Electricity Minister Pu R. Lalzirliana le MLA Zothantluanga nih nizan October 15 ah khan Sihhmui Refugees Relief Camp an va zoh i an herhmi zeimawzat an pek pah hna.

Minister R. Lalzirliana nih cun Mizoram i ralzam a rak lutmi hna cu Mizoram mipi nih an si khawh tawk in an rak zohkhenh ve hna i, a herhning in tuanvo lak zong an timh pengnak kong a chim. “Kan unau nan si bantukin Mizoram mipi nih kan in zohkhenh hna, ralzam hna zong nih democracy nan duh ruang i nan intuarnak hi a sawhsawh a si lai lo” tiah Minister R. Lalzirliana nih cun a chim. Ralzam in Mizoram ah aa dormi hna cu anmah umnak khuatlang hruaitu hna nawl ngaih ding le Khualtlang sermi phungphai tete upat dingin a sawm hna.

Aizawl DC Dr. Lalhriatzuali Ralte nih cun refugees camp a um kan theih hnu in anmah herhhaimi tete zong tuaktan piak an si. Ralzam kong tawlrel dingin Officer hna zong rian khinh an si. Covid zawtnak a karh tuk rih ca ah ralring tein cawlcangh a hau i, ralzam hna zong nih covid zawtnak he pehtlai in phunglam kan sermi tete an zulh ve a herh, tiah a chim.

Minister R. Lalzirliana nih hin amah pumpak phaisa in solar home lighting pali a cawkpiak hna i, MLA Zothantluanga zong nih facang, mehhang le chiti lengah DC nih phaisa tlawmpal a pek hna tiah theih a si.

Afghanistan Bomb Puak Ah Minung 47 An Thi Cang: Oct 15, nizan zanlei sang ah khan Afghanistan, Khandahar District muslim biakinn ngan bik Bibi Fatima Mosque ah bomb a puak. Bomb a puah hnu in atu thawng kan tial tiang ah minung 47 leng an thi cang i midang 50 hrawng nih hliam an tuar, hi bomb puahnak hi ISIS-K nih kanmah tuahmi a si tiah an chim.

Hi bomb a puahnak hmun hi Shia Muslim hna nih an pathian an biaknak hmun nganbik a si. Afghan cozah in biachimnak nawl a ngeimi Sayed Khosi nih amah Twitter ah, Kandahar District i an unau Shia hna mosque ah bomb puahnak ruang i  mi tampi an nunnak a liam thawng an theih cu an ngaihchiat tuknak kong, a tial.

Bomb a puahnak hmun ah hin Taliban special forces hna zong an va phan colh i, thil a canning konglam chekhhlainak an tuah colh. Bomb hi hmun thum ah a puak i, pakhat hi mosque luhnak pawng ah a si, pahnihnak cu a mosque chung ah, a pathumnak cu mosque pin deuh ah a si. Hi ka mosque ah hin minung 500 hrawng an pathian sin thla an cam lio a si.

Hi bomb puahnak kongah hin Islamic State in Khorasan Province (ISIS-K) hna nih anmah tuahmi an sinak kong cu bomb a puah hnu tlawmpal ah an chim colh. ISIS-K thiamthiam nih zarh hmasa deuh ah khan Kunduz Province ah bomb an rak puah cang i, minung zeimawzat an thih leng ah minung 100 leng hliamhma an pu tiah Al Jazeera nih a tial.

By. Tluanga Zathang