BREAKING: Hakha Peng Ah Pu Ceu Thang Inn A Kaang Cuahmah E

The Hakha Times: Hakha Peng Zathal khua ah aruang hngalhlo in Pu Ceu Thang inn a kaang. Nihin October 17, zaanlei 3:30PM hrawng ah Hakha Peng Zathal khua ah Pu Ceu Thang in aruang hngalhlo in a kaang, tiah kan theih.

“Pu Ceu Thang inn cu a ciam dih. Innpa tu cu a tlaih manh lo. Zeiruang ah dah a kangh ti hi fiang in kan hngal kholo,” tiah khuami pakhat nih The Hakha Times ah a chim.

Zathal khua cu Senthang Peng chung ah a um mi a si i Buanlung khua pawngte a si. Inn 80 in 90 kar khuasa an si, tiah kan theih.

Mon Ramkulh Ah Rian Dinhnak A Halmi Khua/Sang Uktu Hna Cu Ralhrang Nih An Onh Hna Lo.

Mon ramkulh i ralhrangbu uknak tangah riantuan duh ti loin rian dinhnak a halmi  khua le sang uktu hhna cu ralhrangbu nih rian dinhnak an onh hna lo tiah theih a si.

Rian dinhnak ca a tialmi khuabawi pakhat nih “Kannih zong thah ton lai kan tih ve cu teh. Pehzulh in rian kan tuan rih ahcun kanmah le kan chungkhar hna caah tih a nung tuk. A caancaan ah cun Dalan, Pyusawhtee sin thawngpetu tibantukin chimceih kan tong. Cucaah rian dinh ka duh tiah penguktu (မြို့နယ်အုပ်ချုပ်ရေးမှူး) sinah ka chim. Cu tikah chuak rih hlah, na chuah ahcun cucu a si lai, khakha a si lai tiah an ka tlerkhonh” tiah a chim. 

Ralhrangbu rian dinhnak nawl an onh hna lo lawng a si lo, hrocernak le tlerhkhonhnak bia zong an chim tiah theih si.

Khuabawi pakhat nih “Keimah lawng ka si lo. Khuabawi dang hna zong ka ngandamnak a tha lo tiin penguktu sinah an chim cio. Cu tikah penguktu nih kan onh hna lo, a si kho lo. Nan chuah zongah dalan an si lai tiin a phunphun in an in soisel hna lai tiin a kan onh lo” tiah a chim.  

Mon ramkulh ah ralhrangbu caah rian a tuanmi khua/sang bawi 10 nak tlawmlo thah an tong cang. Mipi vengtu ralkapbu zong nih khua/sang bawi hna, a rannak in nan rian chuahtak u tian ralrin peknak cathanh an chuah. Ref: Delta News Agency

Ralhrang Nih Ayardaw Ah PDF Ralkap Pahnih An Thah Hna: Ayardaw peng Parami le Kya Pin Hlah (ကြာပင်လှ) khua karlak i a puak lomi bomb pakhat a va phoih  mi PDF mino pahnih cu ralhrang nih an kah hna i a hmun ah an thi tiah khuami nih an chim. 

Oct 15, nizan zinglei ah khan Parami le Kya Pin Hla karlak ah ralhrang mawtaw rual cu LPDF nih bomb in an cheh hna. Cu an chehmi hna lakah a puak lomi bomb pakaht cu PDF ralkap pahnih nih an va phoih lioah ralhrang nih an kahmi hna hi a si.

Khuami pakhat nih “Bomb puahhnawh an ton ruangah ralhrang a thimi an tam ngai. Caan sau nawn hnuah ralhrang an um ti rua lo tiin PDF mino pahnih cu a puak lomi bomb cu an va phoih. Cu lioah aa thupmi ralhrang nih an kah hna i an ruak cu mawtaw ah an khin hna. Tuzing ah an ruak cu an thihnak hmun ah an vun chiah than” tiah a chim. Ref: Delta News Agency

By. Salai CP Lian

Leave a Reply

Your email address will not be published. Required fields are marked *